Gəncədən olan yaradıcı kollektiv Bakıda çıxış edib. Bu haqda 19 fevral tarixində Filarmoniyaya istinadən məlumat veririk.
Tədbir Bakı Musiqi Akademiyası nəzdindəki Opera Studiyasında baş tutub. Burada Gəncə Dövlət Filarmoniyasının Estrada Ansamblının müşayiəti ilə Filarmoniyanın solistləri Rəşid Behbudovun 108 illiyinə həsr olunmuş konsert proqramı ilə çıxış ediblər.
Əməkdar mədəniyyət işçisi Mehparə Cəfərova, Əməkdar artist Tural Abdullayev, Vasif Bayramov, Rüstəm Cəfərov, Əli Məmmədov, həmçinin Bakıdan Xalq artisti Sərxan Sərxan, Abbas Əhməd, Samir Piriyev Rəşid Behbudovun repertuarından "Gəncə", "Zibeydə", "Lalələr", "Gözəlim sənsən", "Sevgilim", "Əziz dost", "Bahar sənsiz", "Azərbaycanım", "Ey Vətən" mahnılarını səsləndiriblər.
Gəncə Dövlət Filarmoniyasının direktoru Əməkdar artist Ramil Qasımov Filarmoniyanın musiqi heyətinə, solistlərinə təşəkkür edib. Həmçinin bildirib ki, Gəncə mədəniyyət torpağıdır.
Konsert proqramı tamaşaçılar tərəfindən böyük rəğbət və gurultulu alqışlarla qarşılanıb.
