Gəncədə küçələrin birində natəmizlik hökm sürür.
Gencexeber.az məlumat verir ki, Gəncə Dövlət Universitetinin nəzdində Regional Kollecinin yanında yerləşən Bayan küçəsində təxminən bir il öncə yaşayış evlərini su ilə təmin edən xətt iki yerdən deşilib.
Sakinlərin sözlərinə görə, qəzalı vəziyyətdə olan boru bu günədək təmir edilməyib. Küçə boyunca uzun məsafədə axan su ərazidə palçıq və iri gölməçələr yaradır. Bu səbəbdən orada sakinlərin hərəkəti məhdudlaşır. Onların yanından keçən nəqliyyat vasitələri isə vətəndaşların üst-başını çirkləndirir.
“Səhər saat 07:00-dan 17:00-a qədər bizə su verilir. Bura çirkli bataqlığa çevrilib. İşə tələsən insanların, məktəbə gedən uşaqların paltarları çirklənir”, – sakin bildirib.
Üzücü məqamlardan biri də odur ki, Gəncədə su qıtlığı olsa da, bu küçədə onsuz da ağır olan vəziyyətin daha da ağırlaşmaması üçün ərazidə yaşayan sakinlər ətrafa axan suyun bir hissəsini arxa yönləndirmək məcburiyyətində qalıblar.
