Gəncədə Cihazqayırma zavodu fəaliyyətini davam etdirir. Bu haqda 10 fevral tarixində Azərbaycan televiziyasına istinadən xəbər veririk.
Gəncə Cihazqayırma zavodunda qaz və su sayğacları istehsal olunur. Burada 250 nəfər çalışır. Sayğacların elektron hissəsi Almaniyadan gətirilir, qalan hissələri isə burada yığılır. Azəriqaz İB-nin sifarişi ilə ildə 300 min qaz sayğacı hazırlanır. Sifarişdən asılı olaraq, zavod daha çox sayğac istehsal etmək gücündədir.
Hal-hazırda zavodda istehsal olunan su və qaz sayğacları Qarabağda və şərqi Zəngəzurda inşası həyata keçirilən mənzillərdə quraşdırılır. Baş mühəndis Vasif Rəhimovun sözlərinə görə, yeni sex yaxın günlərdə istifadəyə veriləcək. Burada mexaniki qaz sayğaclarının yığımı və kalibrlənməsi həyata keçiriləcək. Quraşdırılması nəzərdə tutulmuş müasir avadanlıqların sayəsində istehsal gücü 300 mindən 500 minə qədər yüksələcək.
İxrac coğrafiyasını genişləndirən zavod bu ildən başlayaraq xarici bazar üçün müasir standartlara cavab verən qaz tənzimləyici şkafların kütləvi yığımını həyata keçirməklə satışına başlayacaq.
