Xəbər verdiyimiz kimi, Şəmkir rayonunun Qaracəmirli kəndində baş verən yanğın fərdi yaşayış evini tamamilə məhv edib.
Yanan evin sahibi Xaləddin Məmmədovun Gencexeber.az-a verdiyi məlumata görə, hadisə gecə saat 02:00 radələrində baş verib. 4 nəfərdən ibarət olan ailədə alovun zirzəmidən yuxarı qalxdığını ilk evin xanımı xəbər tutub. Qadın dərhal yoldaşına xəbər verərək ailəsini yanmaqda olan tikilini tərk etməyə çağırıb.
"İlk yoldaşım bilib. Mənə tez gəlib bu barədə dedi. Baxdım, ev zirzəmidən alışıb. Ehtimal edirəm ki, hadisə elektrik qısaqapanmasından baş verib", - Xaləddin Məmmədov bildirib.
Kişinin sözlərinə görə, evdə olan bütün əşyalar yanıb. Eləcə də qızıl-zinət əşyaları, 5000 manat civarında pul məhv olub.
Qeyd edək ki, ümumi sahəsi 155 kvadratmetr olan 4 otaqlı fərdi yaşayış evində qəfil başlayan yanğının söndürülməsi üçün hadisə yerinə Fövqəladə Hallar Nazirliyinin Dövlət Yanğından Mühafizə Xidmətinin Şəmkir Rayon Dövlət Yanğından Mühafizə Hissəsinin əməkdaşları və yanğınsöndürən texnikaları cəlb olunub. Onların müdaxiləsi sayəsində alovun yaxınlıqdakı tikililərə keçməsinin qarşısı alınıb.
Xoşbəxtlikdən hadisə zamanı xəsarət alan olmayıb. Faktla bağlı araşdırma aparılır.
