Dövlət Şəhərsalma və Arxitektura Komitəsinin tabeliyindəki Ərazi Tikinti-Planlaşdırma Mərkəzi “İnşaat Servis-2” Məhdud Məsuliyyətli Cəmiyyəti ilə 1 milyon manatlıq müqavilə bağlayıb.
İqtisadiyyat.аz xəbər verir ki, müqavilədə Ermənistan Respublikası silahlı qüvvələrinin Azərbaycan Respublikası ərazisinə təcavüzü nəticəsində Gəncə şəhərində dağıdılmış, qəzalı vəziyyətə düşmüş, təmir və bərpaya ehtiyacı olan fərdi yaşayış evləri və qeyri-yaşayış obyektlərinin tikintisi, təmiri və bərpası işləri nəzərdə tutulur.
Müqaviləyə əsasən, sözügedən işlərin maliyyə dəyəri 974 023,15 manat müəyyənləşib.
Xatırladaq ki, Ərazi Tikinti-Planlaşdırma Mərkəzi Ermənistan silahlı qüvvələrinin Azərbaycan ərazisinə təcavüzü nəticəsində Gəncə şəhərində dağıdılmış, qəzalı vəziyyətə düşmüş, təmir və bərpaya ehtiyacı olan fərdi yaşayış evləri və qeyri-yaşayış obyektlərinin tikintisi, təmiri və bərpası işləri üzrə 2021-ci ildən indiyədək sözügedən şirkətlə 16,2 milyon manatlıq, “Conco” Qapalı Səhmdar Cəmiyyəti ilə 9 milyon manatlıq, “Az Graft Construction” Məhdud Məsuliyyətli Cəmiyyəti ilə 1,06 milyon manatlıq, “Parlaq-N” Məhdud Məsuliyyətli Cəmiyyəti ilə isə 2,5 milyon manatlıq müqavilələr bağlayıb.
Qeyd edək ki, Ərazi Tikinti-Planlaşdırma Mərkəzi Prezident İlham Əliyevin 19 mart 2019-cu il tarixli fərmanı ilə Bakı Şəhər Memarlıq və Şəhərsalma Baş İdarəsinin tabeliyində olan Xüsusi Layihə-Smeta Bürosu və Şəhər Ərazisinin Tikinti-Planlaşdırma İdarəsinin əsasında yaradılıb. Onun nizamnamə kapitalı 1 milyon manatdır. Eyni fərmanla Mərkəzin Nizamnaməsi və göstərdiyi ödənişli xidmətlərin siyahısı təsdiqlənib. Qurumun fəaliyyət istiqamətləri şəhərsalma, ərazi planlaşdırılması və memarlıq sahələrində mövcud mexanizmləri təkmilləşdirməklə bu sahələri inkişaf etdirmək, göstərilən xidmətlərin keyfiyyətinin artırmaq, həmin sahələr üzrə mövcud vəziyyətin təhlilini həyata keçirməkdən ibarətdir.
