Bu gün gəncəli sənətkarın anadan olduğu gündür. Bu haqda Gencexeber.az 28 fevral tarixində məlumat verir.
Əməkdar artist Nəzakət Məmmədovanın dünyaya gəlməsindən 80 il ötür. Nəzakət Əli qızı Məmmədova 28 fevral 1944-cü ildə Gəncədə göz açıb. Uşaq yaşlarında atasını itirib.
Valideynləri onun müəllim olmasını istəyirdilər. Bunu nəzərə alan gənc qız Bakıda Xarici Dillər İnstitutuna daxil olur. Amma təhsilini yarımçıq qoyaraq, 1966-cı ildə Asəf Zeynallı adına Bakı Musiqi Texnikumuna girir.
Onun səsinə ilk qiyməti Əhməd Bakıxanov və Hacıbaba Hüseynov veriblər. Onların qarşısında "Bayatı-Qacar" oxuyan gənc hər iki sənətkarın diqqətini cəlb edib. Sonralar təhsilini İncəsənət İnstitutunda davam etdirən Məmmədova bir müddət "Lalə" qızlar ansamblında çalışıb. 1968-ci ildə Opera və Balet Teatrına qəbul olunur və 1971-ci ildə tamaşaçılar qarşısına yeni Leylilərdən biri kimi çıxır.
O, "Rast", "Qatar", "Şahnaz", "Segah" və digər muğamların, mahnı və təsniflərin mahir ifaçısı kimi tanınır. Türkiyə, İran, Əfqanıstan‚ Almaniya, Belçika, İtaliya və s. ölkələrdə qastrol səfərlərində olur.
Nəzakət Məmmədova boynundakı qırışlardan azad olmaq üçün Soçidə plastik əməliyyatlarla lisenziyasız məşğul olan Karol Anatoli İvanoviçə müraciət edir. Lakin 21 oktyabr 1980-ci il tarixində əməliyyat zamanı cərrah bıçaqla müğənninin şah damarını kəsir və sənətkar dünyasını dəyişir.
Əslən erməni olan həkim törətdiyi əmələ görə Krasnodar məhkəməsi tərəfindən 9 il azadlıqdan məhrum edilir. Sonradan aparılan istintaq zamanı bəlli olub ki, əməliyyat edən plastik cərrah yox, salonda işləyən “manikür” ustası imiş.
Xanəndə Çəmbərəkənd qəbiristanlığında dəfn olunub. Lakin illər keçəndən sonra o, Gəncədə yaşayan bacısı Kifayət Məmmədovanın yuxusuna girib və ona: “məni Bakıda tək qoymusan, mən sənin yanında olmaq istəyirəm”,- deyib. Kifayət xanım həmin yuxudan sonra onun və anasının məzarını Bakıdan Gəncəyə - İmamzadə Məzarlığına köçürüb.
