Gəncədə tanınmış direktorun xatirəsi əbədiləşdirilib. Bu haqda Gencexeber.az-a 25 dekabr tarixində məlumat daxil olub.
Söhbət respublikanın Əməkdar müəllimi Əkrəm Əsgərovdan gedir. Uzun illər boyunca 4 nömrəli xarici dil təmayüllü məktəb-liseyin direktoru olmuş qabaqcıl maarif xadiminin sözügedən təhsil ocağında xatirə lövhəsi yaradılıb.
Əkrəm (Çingiz) Ələkbər oğlu Əsgərov 27 iyul 1928-ci ildə Şamaxıda anadan olub. Ali təhsilini Moskva Dövlət Pedaqoji İnstitutunda tarix ixtisası üzrə alıb.
1952-1958-ci illərdə Gəncədəki 9 və 11 nömrəli orta məktəblərdə tədris hissə müdiri, 1958-1962-ci illərdə 9 nömrəli məktəbdə direktor, 1962-1963-cü illərdə Şəhər Partiya Komitəsində təbliğat-təşviqat şöbəsinin müdiri vəzifələrində çalışıb.
1963-2010-cu illərdə, 47 il boyunca 4 nömrəli xarici dil təmayüllü məktəb-liseydə direktor işləyib. Sözügedən təhsil ocağı 2008-ci ildə "Ən yaxşı ümumtəhsil məktəbi" müsabiqəsinin qalibi olub. Bu məktəb respublikada "Çingiz müəllimin məktəbi" kimi tanınıb.
1962-1975-ci illərdə Şəhər Sovetinin deputatı və daimi komissiyanın sədri, 1982-1991-ci illərdə Nizami Rayon Sovetinin deputatı və icraiyyə komitəsinin üzvü, 1991-ci ildən ömrünün sonunadək isə Nizami Rayon İcra Hakimiyyəti Şurasının üzvü olub.
