Xəbər verdiyimiz kimi, Tovuzda dönərdən kütləvi zəhərlənmə baş verib.
Gencexeber.az-ın məlumatına görə, artıq zəhərlənən şəxslərin sayı 36 nəfərə çatıb. Onlara lazımı tibbi yardım göstərilib, stasionar müalicəyə ehtiyac olmayıb. Bütün şəxslər evə buraxılıb.
Xatırladaq ki, sözügedən hadisə Tovuz şəhəri, M.Ə.Sabir küçəsində yerləşən “022” dönər evində baş verib. Onlarla şəxs qidadan zəhərlənmə əlamətləri ilə Tovuz Rayon Mərkəzi Xəstəxanasına çatdırılıb. Zərərçəkənlərin arasında azyaşlılar da olub.
Qeyd edək ki, baş verən hadisənin səbəblərinin müəyyənləşdirilməsi ilə bağlı Qida Təhlükəsizliyi Agentliyinin (AQTA) mütəxəssisləri tərəfindən müvafiq qurumların əməkdaşları ilə birgə araşdırmalara başlanılıb. Agentliyin mütəxəssisləri tərəfindən istehlaka təqdim olunan qidalardan nümunələr götürülərək laborator müayinələrə cəlb edilib. İctimai iaşə müəssisəsinin fəaliyyəti məhdudlaşdırılıb.
