Tovuz şəhərində uzun müddətdir bir ana və azyaşlı oğlu evsiz-eşiksiz vəziyyətdə yaşayır.
TvPress.аz xəbər verir ki, Aybəniz adlı qadın və onun 11 yaşlı oğlu Ömər hər gün küçələrdə, binaların bloklarında, vağzal ərazisində gecələyir, çox zaman ac qalırlar. Onların daimi yaşayış yeri və heç bir rəsmi sosial dəstəyi yoxdur. Bəzən təsadüfi insanların verdiyi cüzi maddi yardım və ya ərzaqla dolanırlar.
Uşaq olduqca ağıllı və istedadlıdır, lakin anasının psixi problemləri səbəbindən məktəbə gedə bilmir. Əgər yaxın vaxtlarda onlar sığınacağa yerləşdirilməsə, ana və uşağın qışdan sağ-salamat çıxması real görünmür. Fotolardan da göründüyü kimi, ana və övladı gecəni Tovuz şəhərinin mərkəzi meydanında skamyada yatmaqla keçiriblər.
Məsələ ilə bağlı xahiş olunur ki, aidiyyəti qurumlar – Tovuz Rayon İcra Hakimiyyəti, Əmək və Əhalinin Sosial Müdafiəsi Nazirliyi və digər dövlət orqanları vəziyyətə müdaxilə etsin, ailəyə qidalanma və sosial dəstək göstərilsin, uşağın təhsil hüququnun təmin olunması üçün tədbirlər görülsün.
