Mingəçevir Heydər Məscidində din xadimlərinin, jurnalistlərin, ictimayyət nümayəndələrinin, Mingəçevir Ağsaqqallar şurasının sədrinin iştirakı ilə dəbdəbəli ehsan məclislərinin sadələşdirilməsi müzakirə edilib.
Bizim.mеdiа xəbər verir ki, tədbirdə çıxış edən şəhər Ağsaqqallar şurasının sədri Mustafa Muradov bildirib ki, bütün regionlarda olduğu kimi Mingəçevir şəhərində də ehsan süfrələrinin təmtəraqlı yox, sadələşdirilmiş qaydada olması ilə bağlı müzakirələr aparılmalıdır.
O, bu vəziyyətin Mingəçevir üçün zəruri olduğunu vurğulayıb. Mingəçevir Heydər məscidinin imamı İlham Səmədov da iclasda məsələ ilə bağlı öz fikirlərini belə bildirib:
“Bu, gözəl bir tədbirdir. Çox sağ olun ki, bu təklifi irəli sürmüsünüz. Bu tədbirlər rayon və şəhərdə keçirilir. Məsələ budur ki, biz əvəlcə bunu birinci növbədə öz yaxınlarımızın, doğmalarımızın məclislərində tətbiq etməliyik ki, daha sonra başqalarına tövsiyə edək.
Əgər bu iş Mingəçevirdə baş tutarsa, bu böyük bir nəticə və böyük bir yol ola bilər".
Mingəçevir Heydər məscidinin imam müavini Müşfiq Nəcəfov öz çıxışında belə bir təklifin irəli sürülməsindən razılıq edib.
Telejurnalist İnqilab Şirinbəyli bu məsələyə münasibət bildirərək qeyd edib ki, yas mərasimlərində dəbdəbəli ehsan süfrələrinin yığışdırılması ilə bağlı təşəbbüslər heç də bütün ölkəni əhatə edə bilməz:
“Bu məsələdə biz konkret nəticələrə varmaq istəyiriksə, bu, hüquqi normativ qərarlarla tənzimlənməlidir. Yəni yerlərdən gedən ictimai təşəbbüslərə və təkliflərə müvafiq qurumlardan adekvat reaksiya olmalıdır və bu məsələ Milli Məclisin müvafiq komitəsində Dini Qurumlarla İş üzrə Dövlət Komitəsinin və Qafqaz Müsəlmanları İdarəsinin səlahiyyətli şəxslərinin iştirakı ilə müzakirə olunmalıdır. Eyni zamanda bununla bağlı ictimai dinləmələr keçirilməlidir”.
