Gəncə şəhər 8 nömrəli tam orta məktəbin ingilis dili müəllimi Ülviyyə İsmayılova təkrar sertifikatlaşdırma imtahanında yüksək nəticə göstərib.
“Azərbaycan müəllimi” xəbər verir ki, o, ötən il sertifikatlaşdırmanın ilk cəhdində 28 bal toplayıb. Bu il isə göstərdiyi əzmkarlıqla nəticəsini 59 bala yüksəldib.
Ü.İsmayılova bildirib ki, ötən il müəyyən qədər həyəcan və səhhətində yaranan problemlə bağlı nəticəsi aşağı olub, lakin növbəti imtahan üçün qarşısına məqsəd qoyaraq ciddi şəkildə hazırlaşıb:
“Həm biliklərimi təzələdim, həm də özümü psixoloji cəhətdən imtahana hazırladım. Bu gün də böyük motivasiya hissi ilə imtahana getdim. 2006-cı ildən 8 nömrəli orta məktəbdə ingilis dili müəllimi kimi çalışıram.
Uğursuzluqla qarşılaşan hər bir müəllimə ruhdan düşməməyi və üzərində yenidən çalışıb uğur qazanmağı arzu edirəm. Təkrar sertifikatlaşdırma müəllimə ikinci bir şans verir. Bu, onların potensialına və inkişafına olan inamın göstəricisidir. İlkin mərhələdə uğur qazanmayan təhsilverənlər bu şansdan istifadə edib özlərini təkmilləşdirə və növbəti imtahanda yüksək nəticə göstərə bilərlər”.
Xatırladaq ki, təhsilverənlərin sertifikatlaşdırılması prosesində Nəriman Nərimanov adına 25 nömrəli tam orta məktəbin riyaziyyat müəllimi Fəridə Qurbanova 60 bal toplayıb.
