Samux rayonunda qonşu fermadan oğurluq edən çoban həbs edilib.
Oxu.аz xəbər verir ki, hadisə Samux rayonunun Sarıqaya kəndi ərazisindəki fermada baş verib.
Gəncə şəhər sakini, 1997-ci il təvəllüdlü Elxan Ağayev (ad və soyad şərtidir) boşanandan sonra evlərindən qovulur və küçələrdə qalmaq təhlükəsi ilə üzləşir. O, tanışlarının köməyi ilə Samux rayonu ərazisində Fərman adlı fermerin təsərrüfatında çoban işləməyə başlayır. Bir müddət işlədikdən sonra ona məlum olur ki, yaxınlıqda fəaliyyətini dayandırmış bir ferma var. Elxan bir gün həmin fermaya gedərək, orada olan avadanlıqlara baxır. O, fermada heyvanların su içməsi üçün kəsilmiş uzun borular və su çəni olduğunu görür və həmin avadanlıqları oğurlamaq qərarına gəlir.
Elxan Gəncə şəhərindəki xalası oğluna zəng edərək Samuxda fermada ona məxsus su çəni və boruların olduğunu, həmin avadanlıqları satmaq istədiyini bildirir. O, xalası oğlundan xahiş edir ki, şəhər ərazisindən bir evakuator tapıb onun yanına gəlsin. Xalası oğlu da ona inanıb evakuatorla birlikdə həmin ünvana gəlir. Elxan xalası oğlunun köməyi ilə həmin oğurladığı malları evakuatora yükləyib Gəncə şəhərində metal qəbulu məntəqəsinə gətirir və orada həmin avadanlıqları 900 manata satır. Elxan həmin puldan 150 manat xalası oğluna, 50 manat isə evakuator sürücüsünə verir.
Bir müddətdən sonra fəaliyyətsiz fermanın sahibi obyektinə baxış keçirərkən dəmir boruların və su çəninin oğurlandığını görür və bu barədə polisə məlumat verir.
Polis əməkdaşlarının keçirdikləri əməliyyat tədbirləri ilə hadisəni törədənin Elxan Ağayev olduğu müəyyən edilir və o saxlanılır.
Faktla bağlı cinayət işi başlanır, barəsində məhkəmə qərarı ilə həbs qətimkan tədbiri seçilir.
Samux Rayon Məhkəməsinin hökmü ilə E.Ağayev iki il müddətinə azadlıqdan məhrum edilir.
