Qoşqar çayının Daşkəsən rayonunun Bayan kəndi ərazisindən keçən hissəsi ciddi ekoloji problemlə üz-üzədir.
Yerli sakinlərin Gencexeber.az-a verdiyi məlumata görə, kənd ərazisində yerləşən tövlələrdən, kanalizasiya xətlərindən çıxan çirkab suları birbaşa çaya axıdılır. Habelə məişət və digər təyinatı tullandırlar da çayın məcrasına atılır.
Qoşqar çayının suyu yalnız Bayan kəndi sakinləri tərəfindən deyil, həm də ondan sonra yerləşən 15-ə yaxın kəndin əhalisi tərəfindən müxtəlif məqsədlərlə istifadə olunur. Sakinlər həmin su ilə bağlarını sulayır, heyvanlarını suvarır və bəzi hallarda məişət tələbatı üçün də yararlanırlar. Nəticədə çirklənmiş çay həm insanların sağlamlığı, həm də kənd təsərrüfatı üçün ciddi təhlükə mənbəyinə çevrilib.
Şikayətçilər aidiyyəti qurumlardan məsələyə təcili müdaxilə olunmasını tələb edirlər. Onların sözlərinə görə, çay ekosisteminin bərpası üçün tullantıların qarşısı alınmalı, təmizləmə işləri aparılmalı və kənd təsərrüfatına istifadə olunan suyun keyfiyyətinə nəzarət gücləndirilməlidir.
