Gəncə şəhərinin Cavad Xan qəsəbəsində illərdir davam edən məişət tullantıları problemi sakinləri ciddi narahat edir.
1990-cı illərin sonlarında salınan bu yaşayış massivi bir vaxtlar Gəncə şəhərinin əsas zibil poliqonunun yerləşdiyi ərazidə inşa olunub. Zaman keçdikcə evlərin sayı artıb, paralel olaraq isə tullantı poliqonunun da sahəsi genişlənib.
Hazırda qəsəbədəki yaşayış evləri zibil poliqonunun bir addımlığındadır.
Gencexeber.az-a şikayət ünvanlayan qəsəbə sakinlərinin sözlərinə görə, gün ərzində yüzlərlə məişət tullantısı daşıyan yük avtomobilləri yaşayış massivinin içərisindən keçir:
“Nəticədə tullantıların bir hissəsi küçələrə tökülür, ətraf mühit çirklənir. Pis qoxu səbəbindən qapı və pəncərələri bağlmaqdan təngə gəlmişik. Bu problem uzun müddətdir davam edir və dərdimizə çarə tapan yoxdur”.
Sakinlər aidiyyəti qurumlardan problemin həlli üçün müvafiq addımların atılmasını tələb edirlər.
Qeyd edək ki, sözügedən məişət tullantıları poliqonu Gəncə şəhər İcra Hakimiyyəti yanında Mənzil Kommunal Təsərrüfatı İstehsalat Birliyinin balansındadır.
