Bir müddət əvvəl Goraboyda məktəblilərin dərsə getmək üçün 3 km-lik təhlükəli yol qət etməsi ilə bağlı problemi işıqlandırmışdıq.
Bu gün həmin məktəblilərin valideynləri Gencexeber.az-a başqa bir şikayətlə müraciət ediblər.
İddiaçı valideynlər bildirir ki, gecə Goranboya yağan yağış səbəbindən Təhlə kəndindən Ç.Hümbətov adına Yeniyol kənd tam orta məktəbinə gedən yol palçıqlı və bərbad vəziyyətdədir:
“Sözügedən yolla hazırkı vəziyyətdə nə piyada, nə də velosipedlə getmək mümkündür. Taksi qiymətləri isə kənd sakinləri olaraq cibimizə uyğun deyil, ona görə də uşaqları bu gün dərsə göndərə bilmədik.
Məktəb direktoru Gülbəniz Abbasova isə övladlarımızı məktəbə yollamadığımıza görə bizə hədə-qorxu gəlir, şagirdlərin dərsə gəlmədiyi təqdirdə valideynləri polisə verəcəyini bildirir. Bu hal isə bizi çox narahat edir. Yaranmış vəziyyətdə direktorun bizi hədələməsi nə dərəcədə doğrudur?”
Məsələnin araşdırılması üçün Gəncə-Daşkəsən Regional Təhsil İdarəsinə sorğu ünvanlanıb.
Humay İsgəndərli
