Xəbər verdiyimiz kimi, Şəmkir rayonunun Sabirkənd kəndində 44 günlük Vətən müharibəsində şəhidlik zirvəsinə ucalan igidlərimizin xatirəsinə hər gün ehsan süfrəsi açılır.
Gencexeber.az-a kənd sakini Pərviz Kərimov tərəfindən bildirilib ki, bu təşəbbüs sakinlərin öz arzusu və birliyi ilə həyata keçirilir. Hər il sentyabrın 27-dən etibarən kənd camaatı 44 gün ərzində şəhidlərin ruhuna ehsan verir. Süfrə növbəli şəkildə hər gün kəndin bir sakini tərəfindən açılır.
Qeyd edilib ki, bu ənənənin əsası 2020-ci ildə Vətən müharibəsi başa çatdıqdan sonra qoyulub. Həmin vaxt Sabirkənd kəndinin sakinləri şəhidlərin adına park salaraq onların xatirəsini əbədiləşdiriblər. Elə həmin vaxtdan ehsan verilməsi də hər ilin ayrılmaz hissəsinə çevrilib.
"Bu, hər bir vətəndaşın borcudur. Biz şəhidlərimizi qəlbimizdə yaşatdığımız kimi, cəmiyyətdə də yaşatmalıyıq", – kənd sakini Pərviz Kərimov əlavə edib.
