Gəncədə tibb müəssisələrindən birində qayda pozuntusu aşkarlanıb. Bu haqda 28 fevral tarixində Apa-ya istinadən məlumat veririk.
Hesablama Palatası yoxlamalar aparıb. Nəticədə Z. Məmmədov adına Xəstəxanada nöqsanlar üzə çıxıb. 4 dekabr 2023-cü il tarixində tibb müəssisəsində 33 vərəm xəstəsinin stasionar şəraitdə müalicə aldığı göstərilsə də, faktiki olaraq, 14 nəfər, 15 dekabr tarixində isə 30 nəfərin stasionar şəraitdə müalicə aldığı göstərilsə də, 17 nəfər olub, stasionar müalicədə olan vərəmli xəstələrin xəstəxananı tərk etmələri ilə bağlı şöbənin müdirinin müvafiq razılığı olmayıb.
Həmçinin tibbi xidmətlərin göstərilməsinə dair İcbari Tibbi Sığorta üzrə Dövlət Agentliyi ilə xəstəxana arasında bağlanmış müqavilənin şərtlərinə əməl edilməyib. Belə ki, xidmətlərin dəyəri gecikmələrlə ödənilib.
Auditin əhatə etdiyi illərdə məlumatlar 2-3 ay gecikmə ilə təqdim olunaraq Agentlik tərəfindən 2-3 ay da əlavə olmaqla ekspertizadan keçirilib. Hər ilin son 2 ayı üzrə göstərilmiş xidmətlər barədə məlumatın təqdim edilməsi, ekspertizadan keçirilməsi və ödənilməsi növbəti ildə həyata keçirilib.
