Cari ilin məhsulu üçün payızlıq və yazlıq olmaqla, Qazax rayonunda 11480 hektar sahədə taxıl əkilib ki, bunun da 4645 hektarı buğda, 6835 hektarı arpa sahəsidir.
AZƏRTAC xəbər verir ki, aqrotexniki tədbirlərin vaxtında və keyfiyyətlə həyata keçirilməsi nəticəsində zəmilərdə yetişən məhsul biçilib.
Artıq Qazax rayonunda taxıl biçini başa çatıb. 11480 hektar biçilmiş taxıl sahəsindən 38274,7 ton məhsul götürülüb. Orta məhsuldarlıq 33,3 sentner olub.
Biçin aparılmış 4645 hektar buğda sahəsindən 16301,1 ton buğda toplanıb ki, orta məhsuldarlıq 35,1 sentner təşkil edib.
Biçinin başa çatdığı 6835 hektar arpa sahəsindən 21973,6 ton arpa götürülüb. Orta məhsuldarlıq 32,1 sentnerdir.
Qeyd edək ki, biçinin mütəşəkkil keçirilməsi və optimal müddətdə başa çatdırılması, biçin zamanı təhlükəsizlik tədbirləri ilə bağlı bütün hazırlıq işləri görülüb, texnikalar əvvəlcədən saz vəziyyətə gətirilib. Həmçinin taxıl biçinindən əvvəl yanğın hallarının baş verməməsi üçün risklərin aradan qaldırılması istiqamətində fermerlərlə maarifləndirmə işi aparılıb, taxıl sahəsində yanğın təhlükəsizliyi tədbirləri diqqətdə saxlanılıb, texniki təhlükəsizlik qaydalarına əməl olunub və biçin zamanı heç bir yanğın hadisəsi baş verməyib.
