Bəxtiyar Nadir oğlu Əliyev 1965-ci ildə Qərbi Azərbaycanın Zəngibasar rayonunda anadan olub. Bəxtiyar Gəncə şəhərinin ilk şəhidlərindən biridir.
Gencexeber.az məlumat verir ki, o, 1968-ci ildə ailəsi ilə birlikdə Gəncəyə köçüb. Bəxtiyar Əliyev Gəncə şəhər 1saylı orta məktəbini bitirib. 1983-cü ildə həqiqi hərbi xidmətə çağırılıb. Bəxtiyar 2 il Kamçatkada xidmət etdikdən sonra Gəncəyə geri dönüb, buradakı Sement-beton zavodunda işləməyə başlayıb.
Bəxtiyar Əliyev 1988-ci ildə Milli Azadlıq Hərəkatına qoşulub. Bəxtiyar 100-dən çox erməni ailəsinin Gəncədən çıxarılmasında böyük fəallıq göstərib, onların şəhərdən ərzaq aparmalarına imkan verməyib. O, əksinə, erməni ailələrindən götürdüyü ərzaqlarla Hacıkənddə 44 azərbaycanlı ailəsinin tədarükünü təmin edib.
Ermənistandan gələn vertolyotlar silah və təlim görmüş insanlar daşıyırdı. Onlar Çaykənd ərazisinin dinc əhalisini girov götürüb, hökumət adamlarını belə Göygöl zonasına buraxmırdılar. Buna dözməyən igidlər dəstələr yaradaraq, düşmənin üstünə gedirdilər.
Bəxtiyar Əliyev, Ruzigar Qasımov və Abbasqulu Məmmədov 1990-cı il yanvarın 12-də indiki Göygöl rayonunun Çaykənd (Todan) kəndi ətrafında gedən qızğın döyüşlər zamanı mühasirəyə düşərək hər biri snayper gülləsi ilə şəhid olublar.
Bəxtiyar Əliyev 14 yanvar 1990-cı ildə Gəncənin Şəhidlər xiyabanında dəfn olunub. O, Abbasqulu Məmmədov və Ruzigarı Qasımovla yanaşı Gəncənin ilk şəhidləri hesab olunur. Nizami yurdunda onun adını daşıyan küçə mövcuddur.
