Gəncənin avtobus parkı dünyanın ən iri kommersiya avtomobil istehsalçısılarından birinin məhsulları ilə güclənəcək.
Gencexeber.az-ın əldə etdiyi məlumata əsasən, avtobuslar Çinin dünyaca məşhur kommersiya nəqliyyatı istehsalçısı olan “Yutong” şirkətinə məxsusdur. Sözügedən marka 2023-cü ildə 40 mindən çox avtobus satışı həyata keçirərək bu sahədə dünya lideri kimi tanınıb.
Hazırda Azərbaycana gətirilərək kameralara tuş gələn avtobuslar bu markanın iki məşhur modelini əhatə edir: elektrik mühərrikli “U12” və qazla işləyən daxiliyanma mühərrikli “ZK6831NG”. Gəncə üçün məhz hansı modelin seçiləcəyi barədə hələlik rəsmi açıqlama verilməyib.
Qeyd edək ki, müasir və komfortlu avtobusların Gəncədə ictimai nəqliyyatda istifadəyə verilməsi gözlənilir. Bu addım şəhərdaxili nəqliyyatın yenilənməsi və sərnişinlərə göstərilən xidmətin keyfiyyətinin artırılması məqsədi daşıyır.
