Göygöl rayonunda üç nəfərin ölümü ilə nəticələnən yol-nəqliyyat hadisəsi törətməkdə təqsirli bilinən 1977-ci il təvəllüdlü Eynur Babayevin məhkəməsi başa çatıb.
Teleqraf.аz xəbər verir ki, hadisə ötən ilin avqustun 25-də Bakı-Qazax-Gürcüstan sərhəd yolunun Göygöl rayonu ərazisindən keçən 355-ci kilometrliyində baş verib.
Şəmkir rayon sakini Eynur idarə etdiyi “Renault Megane” minik markalı avtomobillə yol hərəkəti qaydasını pozub.
Nəticədə qarşı tərəfdən gələn “KamAZ” markalı yük avtomobili ilə toqquşub.
Hadisə nəticəsində 1991-ci il təvəllüdlü Əvəz Əliyev, 1968-ci il təvəllüdlü Yeganə Qasımova və 1967-ci il təvəllüdlü Aidə Verdiyeva vəfat edib.
İstintaq orqanı tərəfindən təqsirləndirilən şəxsin barəsində Cinayət Məcəlləsinin 263.3-cü (yol hərəkəti və nəqliyyat vasitələrinin istismarı qaydalarını pozma - bu məcəllənin 263.1-ci maddəsində nəzərdə tutulmuş əməllər ehtiyatsızlıqdan iki və daha çox şəxsin ölümünə səbəb olduqda) maddəsi ilə ittiham elan edilib.
Məhkəmədə ifadə verən təqsirləndirilən şəxs ona elan olunmuş ittiham üzrə özünü təqsirli bilib. O, ifadəsində göstərib ki, hadisə günü əsgərlə görüşə gediblər:
“Həmin vaxt yolu 2 dəfə səhv getdim. Gəncə şəhəri, Dövlət Yol Polisinin Zazalı postuna kimi həyat yoldaşımla telefon ilə danışdım. Gəncə postunu keçdim, doxsanlıq radara çatanda bir siqaret yandırdım. Həmin vaxt yandırıcını yerinə qoyanda bütün dünyam qaraldı. Bundan sonra heç nə yadımda qalmayıb”.
Bu cinayət işinə Gəncə Ağır Cinayətlər Məhkəməsində baxılıb. Məhkəmənin hökmü ilə təqsirləndirilən şəxs 7 il müddətinə azadlıqdan məhrum edilib. Ona 4 il müddətə nəqliyyat vasitələrini idarə etmək qadağan olunub.
Müttəhimin cəzasını ümumi rejimli cəzaçəkmə müəssisəsində çəkməsi qərara alınıb.
Təqsirləndirilən şəxsin barəsində seçilmiş başqa yerə getməmək haqqında iltizam qətimkan tədbiri həbs qətimkan tədbiri ilə dəyişdirilib. O, məhkəmə zalından həbsə alınıb.
