Gəncənin üç ali təhsil müəssisəsi daha iki universitetlə anlaşıb. Bu haqda 6 mart tarixində ATU-ya istinadən məlumat veririk.
ADİU (UNEC), Gəncə Dövlət Universiteti, Azərbaycan Dövlət Aqrar Universiteti, Mingəçevir Dövlət Universiteti və Azərbaycan Texnologiya Universiteti tərəfindən hər il Gəncə Yaşıl İqtisadiyyat Forumunun keçirilməsi barədə Anlaşma Memorandumunun imzalanması məqsədilə görüş keçirilib. Tədbir onlayn formatda baş tutub.
Burada kənd təsərrüfatı nazirinin müavini İlhamə Qədimova, ekologiya və təbii sərvətlər nazirinin müavini Vüqar Kərimov, Birinci Vitse-Prezidentin Katibliyinin baş məsləhətçisi Elmar Məmmədov, İqtisadiyyat Nazirliyinin Dayanıqlı inkişaf və sosial siyasət şöbəsinin müdiri Hüseyn Hüseynov, ADİU-nun rektoru professor Ədalət Muradov, GDU-nun rektoru professor Yusif Yusibov, GDU-nun prorektoru Pərvin Kərimzadə, ADAU-nun rektoru Zəfər Qurbanov, MDU-nun rektoru Şahin Bayramov və ATU-nun rektoru vəzifəsini icra edən Yaşar Ömərov çıxış ediblər.
Görüşdə ölkəmizdə ilk dəfə reallaşdırılacaq bu təşəbbüsün əsas hədəfinin iqlim dəyişmələri ilə mübarizə, yaşıl iqtisadiyyata keçid, yaşıl artım üzrə dünya təcrübəsinin öyrənilməsi, bu istiqamətdə insan kapitalının inkişaf etdirilməsi, professor-müəllim heyəti və tələbələr tərəfindən elmi tədqiqatların aparılması, yaşıl startapların yaradılması, “yaşıl” sektorların inkişaf etdirilməsi, dövlət-özəl “yaşıl” tərəfdaşlığının təşviq edilməsi, beynəlxalq əməkdaşlığın inkişaf etdirilməsi, “ağıllı yaşıl keçid”in müəyyən edilməsi işinə töhfə verməkdən ibarət olduğunu bildiriblər.
İştirakçılar “Yaşıl dünya naminə həmrəylik ili” elan olunmasının əhəmiyyətini vurğulayaraq, keçiriləcək ilk forumun da məhz həmin çərçivədə təşkil olunacağını qeyd ediblər. Bildirilib ki, Gəncə Yaşıl İqtisadiyyat Forumu 5 İyun - Ümumdünya Ətraf Mühit Günündə öz işinə başlayacaq və hər il 5-7 iyun tarixlərində şəhərimizdə təşkil olunacaq. Ölkəmizin digər universitetləri də Forumun üzvlüyünə qoşula biləcəklər.
Sonda 5 tərəfdaş universitetin rəhbərləri arasında layihənin reallaşdırılması məqsədilə Anlaşma Memorandumu imzalanıb.
