Gəncədə “BakuBus” MMC-yə məxsus yeni avtobus parkının tikintisi sürətlə davam edir.
Gencexeber.az-ın məlumatına görə, sərnişindaşıma sahəsində xidmətlərini Gəncə şəhərində də təqdim edəcək şirkət bunun üçün infrastruktur işlərinə başlayıb. Avtobus parkı Gəncə Beynəlxalq avtovağzalının arxasında, geniş ərazidə inşa olunur.
Artıq tikinti sahəsində canlı qüvvə və xüsusi texnika vasitəsilə binanın əsas hissəsi tamamlanıb. Hazırda parkın nəzarət-buraxılış məntəqəsinin, eləcə də dayanacaq meydanın inşası aparılır.
Layihənin yaxın aylarda yekunlaşdırılması və istifadəyə verilməsi planlaşdırılır. Bu təşəbbüs Gəncədə ictimai nəqliyyat xidmətlərinin keyfiyyətinin yüksəldilməsinə yönəlib.
Qeyd edək ki, layihələndirməni Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin “Azərdövlətlayihə” Dövlət Baş Layihə İnstitutu həyata keçirəcək. Bu işin 240 min manata başa gələcəyi gözlənilir.
