Xəbər verdiyimiz kimi, Gəncədə ictimai nəqliyyat xidmətində yeni mərhələyə start verilir. Şəhərdə sərnişin daşımalarının keyfiyyətini yüksəltmək məqsədilə “BakuBus” MMC-nin fəaliyyəti üçün hazırlıq işləri sürətlə davam edir.
Gencexeber.az məlumat verir ki, Gəncə Beynəlxalq Avtovağzalının arxasında, geniş ərazidə şirkətə məxsus müasir avtobus parkı inşa olunur. Artıq Nizami yurduna müxtəlif markalara aid yeni avtobuslar gətirilib və onların yaxın vaxtlarda xəttə buraxılması planlaşdırılır.
Qeyd edək ki, yeniliklər təkcə texniki tərəqqi ilə məhdudlaşmır. Azərbaycan Yerüstü Nəqliyyat Agentliyi (AYNA) ictimai nəqliyyatda qadın sürücüləri də xüsusi təlim proqramına cəlb etməyə başlayıb. Bu təşəbbüs paytaxtdan sonra Gəncədə də tətbiq olunacağı halda, şəhərin nəqliyyat mühitində mühüm dəyişikliklər yarada bilər.
Proqram çərçivəsində namizədlərə avtobus idarəçiliyi üzrə nəzəri və praktiki biliklər aşılanır. Təlimlər təkcə sürücülük bacarıqlarını deyil, etik davranış, ünsiyyət mədəniyyəti və təhlükəsizlik qaydalarını da əhatə edir. Xüsusi olaraq əlilliyi olan sərnişinlərlə düzgün rəftar qaydaları öyrədilir. Məqsəd – yol hərəkətinin təhlükəsizliyini təmin edən, sərnişinlərlə nəzakətli ünsiyyət quran və böhran anlarında soyuqqanlı davranan peşəkar qadın sürücülər yetişdirməkdir.
Praktiki məşğələlərdə iştirakçılar baxış texnikası, manevretmə, dayanma və durma qaydaları üzrə intensiv məşqlər edirlər. Mürəkkəb yol şəraitində idarəetmə, arxa və ön parketmə, slalom hərəkətləri, dönmə trayektoriyalarının düzgün seçilməsi və təhlükəsiz ara məsafəsinin qorunması kimi bacarıqlar xüsusi diqqət mərkəzindədir.
Beləliklə, “BakuBus”ın Gəncədə fəaliyyəti yalnız yeni avtobusların istifadəyə verilməsi ilə kifayətlənməsə, şəhərin nəqliyyat sistemində həm sosial, həm də mədəni baxımdan yeni səhifə açıla bilər.
