Bir qayda olaraq mərkəzi şəhərlərə axın olur. Bu axının bir sıra səbəbləri var. Həmin səbəblərdən biri də maaşlardakı fərqlərdir. Belə ki, Bakıda bölgələrə nisbətən əməkhaqqı daha yüksəkdir. Halbuki iş yükü eynidir.
Elə isə mərkəzi şəhərlərlə müqayisədə regionlarda əməkhaqqı niyə aşağıdır?
Mövzu ilə bağlı bizim.mеdia-ya danışan iqtisadçı ekspert Fuad İbrahimov deyir ki, belə fərq təkcə Bakı ilə bölgələr arasında deyil:
“İstənilən meqapolislə qonşu şəhəri müqayisə etsək belə bu fərqi görərik. Hətta bu fərq inkişaf etmiş ölkələrdə var. Məsələn, Almaniyanın mərkəzi şəhərləri ilə müqayisədə əyalətlərdə əmək haqqı xeyli aşağıdır. Burada təəccüblü heç nə yoxdur. Bunun bir səbəbi odur ki, iri şəhərlərdə xərclər yüksəkdir.
Digər bir səbəb odur ki, mərkəzi şəhərlərdə təklif tələbi üstələyir. Eyni iş üçün çox sayda təşkilat işçi axtarır.
Amma bölgələrdə rəqabət demək olar ki, yoxdur. İş yerlərinin az olması əməkhaqqının yuvarlaq olmasına əsas yaradır. Bu məsələdə başqa səbəblər də var. Fikir verin, hətta rüsumlara baxsaq belə görərik ki, regionlarda tətbiq edilən rüsumlar Bakıyla müqayisədə aşağıdır. Ona görə də bu məsələdə ənənəvi yanaşmalar var”.
