Gəncə sakini xuliqanlığa görə saxlanılıb. Bu haqda 20 aprel tarixində Qafqazinfo-ya istinadən məlumat veririk.
Hadisə paytaxtın Nərimanov rayonunun Yusif Vəzir Çəmənzəminli küçəsində qeydə alınıb. 30 yaşlı Gəncə şəhər sakini Z.Məmmədov ərazidə parkalanma fəaliyyətinə nəzarət edən “Azparking” əməkdaşına qarşı kobud davranaraq onu təhqir edib.
Bildirilir ki, avtomobilini park edən sürücü şirkətin işçisinə hər hansı ödəniş etmək fikrində olmadığını deyib. Parklanmanı tənzimləyən şəxs isə ona mobil tətbiq vasitəsilə ödəniş edə biləcəyini bildirib. Bu vaxt Məmmədov onu söyərək təhqir edib.
Faktla bağlı polisə müraciət edildikdən sonra sürücü saxlanılıb. Onun barəsində İnzibati Xətalar Məcəlləsinin 510-cu (Xırda xuliqanlıq) maddəsi ilə protokol tərtib edilib.
Nərimanov Rayon Məhkəməsinin qərarı ilə Məmmədova 10 sutka inzibati həbs cəzası verilib.
Qeyd edək ki, saxlanılan şəxs “Muzey” hoteldə icraçı direktor vəzifəsində işləyir.
