Xəbər verdiyimiz kimi, qaz təsərrüfatında aparılan yenidənqurma işləri ilə əlaqədar olaraq, iyulun 8-i saat 09:00-dan etibarən Gəncə şəhərinin bütün ərazisində qaz verilişi dayandırılıb. Təmir işlərinin iki gün davam edəcəyi bildirilib.
Gencexeber.az-ın məlumatına görə, bununla əlaqədar “Azəriqaz” İstehsalat Birliyi (İB) tərəfindən bəzi sakinlərə SMS vasitəsilə bildiriş göndərilib. Lakin redaksiyamıza daxil olan şikayətə əsasən, xəbərdarlıq mətnində yol verilən kobud yanlışlıq yerli sakinlərin narazılığına səbəb olub.
Belə ki, SMS-də Gəncə “şəhər” kimi yox, “rayon” kimi qeyd edilib: “08.07.2025, 10:00-dan Gəncə RAY. Sevinc qəs. qaz təchizatında fasilə yaranacaq. Təminat gün ərzində bərpa ediləcək”.
Sakinlər bildirir ki, Azərbaycanın ikinci böyük şəhəri olan Gəncənin inzibati statusunun səhv göstərilməsi ciddi diqqətsizlikdir.
Qeyd edək ki, Gəncə respublika tabeli şəhərdir və heç bir rayonun tərkibində deyil.
