Gəncə şəhəri 46 saylı körpələr evi–uşaq bağçasında yaranan təhlükəli vəziyyət aradan qaldırılıb.
Gencexeber.az-ın məlumatına görə, bağçanın həyətində təxminən bir il əvvəl güclü külək nəticəsində yerindən qoparaq aşan və daxili yolu tamamilə kəsən qaz borusunun təmiri üzrə müvafiq işlər görülüb.
Bağçanın rəhbərliyi tərəfindən məsələ ilə bağlı dəfələrlə "Azəriqaz" ASC-yə müraciət edilsə də, problem həllini tapmamışdı. Lakin uşaqlar və müəssisə əməkdaşları üçün ciddi təhlükə yaradan vəziyyət redaksiyamıza daxil olan şikayət ictimaiyyətə çatdırıldıqdan sonra aradan qaldırılıb.
Belə ki, qurumun əməkdaşları tərəfindən sözügedən borunun düşən hissəsi kəsilərək təhlükəsizlik normalarına uyğun şəkildə yolun üzərindən keçirilib.
Xatırladaq ki, Gəncə şəhəri 46 saylı körpələr evinin həyətində qaz borusu bir ildən çox müddət ərazində həm təhlükə mənbəyi olaraq qalıb, həm də bağçanın normal fəaliyyətinə mane olub. "Azəriqaz" ASC-dən bağça rəhbərliyinə isə bildirilmişdir ki, təmir işləri üçün borunun alınması və bərpa işlərinin təşkili müəssisənin öz hesabına həyata keçirilməlidir.
