"BakuBus MMC"-nin Gəncə şəhərində fəaliyyətə başlaması ilə əlaqədar ictimai nəqliyyat infrastrukturunda həyata keçirilən dəyişikliklərə əsasən sürücülər yalnız müəyyən olunmuş dayanacaqlarda sərnişin endirmə və ya mindirmə həyata keçirə bilərlər.
Bu barədə Gencexeber.az-a adıçəkilən sərnişindaşıma şirkətindən məlumat verilib.
Qurum tərəfindən sərnişinlərdən xahiş olunur ki, avtobuslardan istifadə zamanı yalnız rəsmi dayanacaqlardan istifadə edərək mövcud qaydalara riayət etsinlər.
Əlavə edilib ki, "BakuBus" MMC olaraq sərnişin və sürücülərin təhlükəsizliyi daim prioritetdir və bu istiqamətdə bütün zəruri tədbirlər görülür.
Qeyd edək ki, vətəndaşların dayanacaqlardan kənar yerlərdə sürücülərdən avtobusları saxlamasını tələb etməsi bəzən nəqliyyat vasitələrinin daxilində gərginliyə və mübahisələrə səbəb olur. Redaksiyamız tərəfindən bu kimi hallarla bağlı videogörüntülər ictimaiyyətin diqqətinə çatdırılıb.
