Gəncəli Tural Əkbərov Almaniyada “AUDI” modellərinin oturacaqları üzrə aparıcı mühəndis kimi çalışır.
Gencexeber.az-ın məlumatına görə, Gəncədə boya-başa çatan 26 yaşlı Tural Əkbərov Almaniyanın Münhen şəhərində avtomobil sənayesi sahəsində mühüm nailiyyətlərə imza atır.
Orta məktəb təhsilini Gəncədə başa vuran Tural Əkbərov, Azərbaycan Dövlət Neft və Sənaye Universitetinin Mexanika mühəndisliyi fakültəsinin məzunudur. O, artıq 4 ildir ki, Almaniyada yaşayır və “AUDI AG” şirkətinin tərəfdaşı olan “EDAG Engineering” şirkətində avtomobil oturacaqlarının inkişafı üzrə ilk azərbaycanlı aparıcı məsul mühəndisi kimi fəaliyyət göstərir.
Tural Əkbərov məşhur “A1”, “A8”, “Q5” və “R8” modellərinin oturacaqları üzrə cavabdeh mühəndisdir. Onun rəhbərliyi altında “AUDI A8” (AU651 D5) modelinin oturacaqları Avropa və Amerika standartlarına — “ECE R17 Rev.10” və “FMVSS 202A” — uyğun şəkildə “AUDI Neckarsulm” zavodunda dizayn və istehsal edilib.
Hazırda Tural Əkbərov Almaniyanın İngolstadt Texniki Universitetində Avtomobil mühəndisliyi üzrə magistr təhsilinin sonuncu semestrini tamamlayır. Gənc mühəndis gələcək semestrdən doktorantura təhsilinə başlamağı planlaşdırır.
