Gəncə universitetlərindən biri yeni müqavilə bağlayıb. Bu haqda 5 yanvar tarixində ATU-ya istinadən məlumat veririk.
Azərbaycan Texnologiya Universiteti ilk ikili diplom proqramını Avropa ali təhsil müəssisəsi ilə imzalayıb. Təhsil ocağı Polşanın Bialystok Texnologiya Universiteti ilə anlaşıb.
Magistratura səviyyəsində "Nəqliyyat logistikası" proqramı üzrə ikili diplom müqaviləsi ATU-nun rektoru vəzifəsini müvəqqəti icra edən Yaşar Ömərovla Bialystok Texnologiya Universitetinin rektoru Marta Kosior-Kazberuk tərəfindən imzalanıb.
Proqrama növbəti tədris ilindən qəbul aparılması nəzərdə tutulub. Magistrantlar iki semestr ATU-da, digər iki semestr isə Bialystok Texnologiya Universitetində təhsil ala biləcəklər və sonda hər iki universitetin magistr diplomunu qazanacaqlar.
Qeyd edək ki, ikili diplom proqramında tədris ingilis dilində aparılacaq.
