Azərbaycan Texnologiya Universitetinə təyin edilən yeni prorektor kollektivə təqdim edilib.
Gencexeber.az-a adıçəkilən təhsil ocağının mətbuat xidmətindən verilən məlumata görə, rektor Yaşar Ömərov yeni təyinatla bağlı nazirliyin əmrini kollektivin diqqətinə çatdırıb və bildirib ki, Azərbaycan Respublikasının elm və təhsil naziri Emin Əmrullayevin əmrinə əsasən Sahil Zahid oğlu Həmidov Azərbaycan Texnologiya Universitetinin elm və innovasiya məsələləri üzrə prorektoru vəzifəsinə təyin olunub. Yaşar Ömərov S.Həmidova fəaliyyətində uğurlar arzu edib.
S.Həmidov öz növbəsində elm və təhsil naziri Emin Əmrullayevə təşəkkür ifadə edərək göstərilən etimadı doğruldacağını bildirib, universitetin inkişafı istiqamətində bütün səylərini birləşdirərək bundan sonra da əzmlə çalışacağını qeyd edib.
