Gəncədə tələbələr üçün təqaüd təsis edilib. Bu haqda 29 yanvar tarixində ATU-ya istinadən məlumat veririk.
Söhbət Azərbaycan Texnologiya Universitetindən gedir. Təqaüd təhsil müəssisəsi ilə əməkdaşlıq münasibətləri çərçivəsində “ATS Food” MMC tərəfindən təsis edilib.
Bu barədə ATU-nun rektor vəzifəsini müvəqqəti icra edən Yaşar Ömərovla MMC-nin icraçı direktoru Tural Hacıyev arasında görüş keçirilib. Tədbirdə razılaşma əldə olunaraq müvafiq saziş imzalanıb.
Sənədə əsasən, xüsusi təqaüd universitetin “Qida mühəndisliyi”, “Şərabçılıq” və “Ekologiya mühəndisliyi” ixtisaslarında təhsil alan, ən yüksək akademik göstəricilərə malik 2 tələbəsinə veriləcək. Təqaüd hər tələbə üçün 100 manat məbləğində müəyyən olunub.
Görüşdə ötən ilin oktyabr ayında imzalanmış Əməkdaşlıq memorandumunun reallaşdırılması imkanları, əməkdaşlığın perspektivləri, birgə kadr hazırlığı və tədbirlərin keçirilməsi məsələləri də müzakirə edilib. Toplantı çərçivəsində ATU nümayəndə heyəti “ATS Food”a məxsus "Çörəkçi" zavoduna səfər edərək müəssisənin fəaliyyəti, istifadə olunan texnoloji maşınlar və texnologiyalarla ətraflı tanış olub. Burada ATU tələbələrinin istehsalat təcrübəsinin təşkili məsələsi müzakirə edilib.
