Xəbər verdiyimiz kimi, oktyabrın 6-da saat 18:00 radələrində Şəmkir rayonu Şiştəpə kəndi ərazisində 1971-ci il təvəllüdlü Arif Hacıyev həyat yoldaşı, 1984-cü il təvəllüdlü Röyalə Hacıyevanın boğazını kəsərək qətlə yetirib.
Gencexeber.az-a qətl törətməkdə şübhəli bilinən şəxsin qardaşı Mübariz Hacıyev müsahibəsində bildirib ki, ər və arvad arasında münaqişənin başlamasına səbəb qadının sədaqətsizliyi olub. Sözügedən məsələ boşanma mərhələsində olan cütlüyün məhkəmə prosesində hakimin də diqqətinə çatdırılıb.
"Xəyanətdir. Yazı-pozu, video - hamısı var. Vermişdik məhkəməyə ki, boşansınlar. Dedik çıxsın getsin, o da (qətlə yetirilən Röyalə Hacıyeva – red.) qaldı. Evi tərk etmək istəməyib. Hər gecə fərqli maşınla evə gəlirdi. Deyirdi ki, haqq edirəm. Onu hansı kişi götürər?" - qətl törətməkdə şübhəli bilinən şəxsin qardaşı Mübariz Hacıyev bildirib.
Bundan başqa, hadisə zamanı ailənin 17 yaşlı oğlu Ayxan Hacıyev hər iki əli və budundan yaralanıb. Ona Şəmkir Rayon Mərkəzi Xəstəxanasının Təcili tibbi yardım şöbəsində zəruri tibbi yardım göstərilib və ambulator müalicə üçün evə buraxılıb.
Əlavə edilib ki, həyatını itirən qadınla bağlı yas mərasiminin təşkil olunması nəzərdə tutulmur.
Qeyd edək ki, faktla bağlı Şəmkir rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. Arif Hacıyev rayon prokurorluğu tərəfindən şübhəli şəxs qismində tutulub. İbtidai istintaq davam edir.
