19 sentyabr 2023-cü ildə Azərbaycan Ordusunun Qarabağda həyata keçirdiyi lokal xarakterli antiterror tədbirləri zamanı erməni silahlı qüvvələrinə ağır zərbələr vuruldu. Döyüşlər 23 saat 43 dəqiqə davam etdi. Bundan sonra tam atəşkəs haqqında razılaşma əldə olundu və sentyabrın 20-də antiterror əməliyyatı tədbirləri dayandırıldı.
Gencexeber.az məlumat verir ki, sözügedən döyüşlər nəticəsində Ermənistan ordusu tam tərksilah edilərək ölkədən çıxarıldı, Qarabağda qeyri-qanuni xunta rejimi ləğv edildi, Azərbaycanın dövlət suverenliyi təmin edildi və nəhayət, Xankəndi, Xocalı, Ağdərə, Xocavənd, Əsgəran kimi bölgələrimizdə də üçrəngli bayrağımız yüksəldi.
Hərbi əməliyyatlar zamanı Gəncədən olan 5 hərbi qulluqçu şəhidlik zirvəsinə ucalıb.
– Kərəm Akif oğlu Həsənov 1 yanvar 1996-cı ildə dünyaya gəlib. Cəmşid Naxçıvanski adına Hərbi lisey, Heydər Əliyev adına Azərbaycan Ali Hərbi Məktəbində təhsil alıb. Daha sonra Kərəm Azərbaycan Silahlı Qüvvələrində xidmət edib. "Baş leytenant" hərbi rütbəsini daşıyan Kərəm 20 sentyabr 2023-cü il tarixində həyata keçirilmiş lokal antiterror tədbirləri zamanı Xocavənd rayonu istiqamətində gedən döyüşlərdə şəhidlik zirvəsinə yüksəlib. Şəhidimiz evli idi, onun vətənə əmanət 1 övladı qalıb.
– Murad Xidir oğlu Axundov 4 avqust 2004-cü ildə anadan olub. Orta təhsilini Gəncə şəhəri 19 saylı orta məktəbdə alıb. Murad 20 sentyabr 2023-cü il tarixində Xocavənd istiqamətində gedən döyüşlərdə şəhidlik zirvəsinə ucalıb.
– Oruc Arif oğlu Bədəlov 5 dekabr 2002-ci ildə dünyaya göz açıb. 10 saylı tam orta məktəbdə təhsil alıb. Oruc anasının vəfatından 5 ay sonra, 19 sentyabr 2023-cü il tarixində Ağdam rayonu Sırxavənd kəndi istiqamətində gedən döyüşlərdə şəhidlik zirvəsinə ucalıb.
– Ramal Elnur oğlu Ələkbərov 24 aprel 2005-ci ildə anadan olub. Gəncə şəhəri 7 saylı məktəbdə təhsil alıb. 19 sentyabr 2023-cü il tarixində Ağdam rayonu Abdal-Gülablı kəndi istiqamətində gedən döyüşlərdə şəhidlik zirvəsinə ucalıb.
– Orxan Eldar oğlu Əliyev 25 iyun 1986-cı ildə dünyaya gəlib. 17 saylı tam orta məktəbdə təhsil alıb. Orxan İkinci Qarabağ müharibəsində qəhrəmancasına iştirak edib. 20 sentyabr 2023-cü il tarixində həyata keçirilmiş lokal antiterror tədbirləri zamanı Xankəndi rayonu istiqamətində gedən döyüşlərdə şəhidlik zirvəsinə ucalıb. Şəhidimiz evli idi, onun vətənə əmanət 2 övladı qalıb.
