Azərbaycanda alkoqoldan asılı şəxslərin diaqnostika və müalicəsi İcbari Tibbi Sığorta Xidmətlər Zərfi çərçivəsində pulsuz şəkildə həyata keçirilir.
Gencexeber.az-a İcbari Tibbi Sığorta üzrə Dövlət Agentliyindən bildirilib ki, müalicə prosesi xəstənin vəziyyətinin stabilləşdirilməsi, alkoqoldan asılılığın fizioloji və psixoloji təsirlərinin azaldılması və yenidən spirtli içki qəbulunun qarşısının alınmasına yönəlib.
Qeyd olunub ki, alkoqol mənşəli psixi və davranış pozuntuları zamanı göstərilən tibbi xidmətlərə həkim-psixiatr tərəfindən ambulator müayinə və konsultasiya, ilkin diaqnostika, psixoloji qiymətləndirmə, eləcə də tibbi göstəriş olduğu halda stasionar müalicə daxildir.
Ümumdünya Səhiyyə Təşkilatının məlumatına görə, hazırda dünyada 400 milyona yaxın insan alkoqol və narkotik istifadəsi pozuntularından əziyyət çəkir. Onların 209 milyonu psixi və davranış pozuntuları ilə müşahidə olunan alkoqol asılılığına düçar olub.
Mütəxəssislər bildirirlər ki, alkoqoldan asılı şəxslərin təxminən 45–50%-i həyatlarının müəyyən mərhələsində ciddi psixi pozuntularla qarşılaşır.
