Gəncə şəhərində yerləşən Adilxan Ziyadxanov küçəsində yolun vəziyyəti sakinlərin narazılığına səbəb olub.
Gencexeber.az-a ünvanlanan şikayətlərə görə, küçə aylar əvvəl qazılsa da, əraziyə yenidən asfalt örtüyü salınmayıb. Nəticədə yolun müxtəlif hissələrində ciddi çöküntülər yaranıb, yağış suları isə vəziyyəti daha da ağırlaşdırıb.
İddia olunur ki, dəfələrlə edilən müraciətlərə baxmayaraq, problem aradan qaldırılmır. Sakinlərin sözlərinə əsasən, aidiyyəti qurumlar tərəfindən yalnız problemli hissələrə xırda daş və qum tökülür.
Vətəndaşların sözlərinə görə, bəzi hissələrdə asfalt örtüyü salınsa da, yolun ümumi vəziyyəti normativ tələblərə cavab vermir və nəqliyyatın şəhər ərazisində icazə verilən sürət həddi ilə hərəkəti faktiki olaraq mümkünsüzdür. Onların sözlərinə görə, yağışlı hava şəraiti zamanı küçə daha da keçilməz hala düşür.
Sakinlər aidiyyəti qurumlardan problemin əsaslı şəkildə həll olunmasını, küçəyə keyfiyyətli asfalt örtüyünün çəkilməsini istəyirlər.
