Azərbaycan Dövlət Aqrar Universitetində (ADAU) yay semestri təşkil olunacaq.
Gencexeber.az bildirir ki, yay semestri könüllülük prinsipi əsasında və ödənişli əsaslarla həyata keçirilir.
Semestrin təşkili aşağıdakı məqsədlərə xidmət edir:
tələbələrin akademik borclarının aradan qaldırılması;
fənlərin prerekvizitliyi nəzərə alınmaqla, humanitar fənlər bölməsinə daxil olan və universitet tərəfindən müəyyən edilmiş seçmə fənlər üzrə kreditlərin toplanması;
müvəffəq qiymət alınmış fənlər üzrə nəticələrin yaxşılaşdırılması;
ADAU-nun təklif etdiyi fənlər üzrə digər ali təhsil müəssisələrinin tələbələrinə müvafiq kreditlərin qazanılması üçün şərait yaradılması.
Yay semestrində tələbənin qeydiyyatdan keçə biləcəyi kreditin ümumi həcmi 10-dan artıq olmamalıdır.
Qaydalar nəzərə alınmaqla, semestr ərzində dərslərin 50 faizindən çoxunda iştirak etmiş, lakin imtahana buraxılmamış tələbələr də yay semestrində həmin fənlərdən iştirak hüququna malikdirlər.
Yay semestri 21 iyul – 22 avqust tarixlərini əhatə edən nəzəri təlim mərhələsini, 25 – 30 avqust tarixlərini isə imtahan sessiyasını əhatə edəcək. Qiyabi təhsil alan tələbələr üçün isə yay semestrinin müddəti (təlim və imtahan daxil olmaqla) 3 həftə müəyyən edilib.
Yay semestrində iştirak etmək istəyən tələbələr 17 iyul 2025-ci il tarixinədək dekanlığa və akademik məsləhətçiyə (tyutora) ərizə ilə müraciət etməlidirlər.
