Şəmkir rayonunda 54 yaşlı kişi həyat yoldaşına xəsarət yetirib.
Demokrat.az xəbər verir ki, hadisə bu ilin mayın 3-də, ər-arvadın birgə yaşadıqları evdə baş verib. 1971-ci il təvəllüdlü Həbib həyat yoldaşı Zahirə ilə mübahisə edib. Mübahisəyə səbəb qadının gecə evə gəlməməsi olub. Əsəbiləşən kişi həyat yoldaşının baş nahiyəsinə yumruq zərbələri endirib.
Hadisədən sonra Həbibin barəsində Cinayət Məcəlləsinin 128-ci — yəni qəsdən sağlamlığa zərər vurma maddəsi ilə cinayət işi açılıb. Təqsirləndirilən şəxs ifadəsində özünü təqsirli bilib. O bildirib ki, həyat yoldaşı gecələr təbii ehtiyacını evdəki qabda ödəmədiyi üçün dəfələrlə irad bildirib. Hadisə günü bu məsələ üzündən yenidən aralarında mübahisə yaranıb və həmin an əsəbiləşərək arvadını döyüb.
Zərərçəkmiş Zahirə isə ifadəsində deyib ki, hadisədən bir gün əvvəl ərinə zəng edərək gecəni qızının evində qalacağını bildirib. Həbib buna razılaşıb. Lakin ertəsi gün qadın evə qayıdarkən, ərinin etirazı və iradı ilə qarşılaşıb, daha sonra isə onun tərəfindən döyülüb.
Şəmkir Rayon Məhkəməsinin hökmü ilə Həbibə 8 ay müddətinə azadlığın məhdudlaşdırılması cəzası təyin edilib. Məhkəmə qərarına əsasən, o, bu müddət ərzində Şəmkir rayonunun hüdudlarını, həmçinin gecə saat 23:00-dan səhər 07:00-dək evini tərk etməməlidir.
Bundan əlavə, təqsirləndirilən şəxsə elektron nəzarət vasitəsi taxılıb. O, həmin cihazı işlək vəziyyətdə saxlamalı, yaşayış yerini məhkəmənin icazəsi olmadan dəyişməməli və iş və ya təhsil yerində baş verən dəyişikliklər barədə əvvəlcədən nəzarət orqanını məlumatlandırmalıdır.
