71 yaşlı Gəncə paxlavası ustası Dürdanə xanım bu unikal şirniyyatın hazırlanma qaydasını redaksiyamızla bölüşüb.
Gencexeber.az məlumat verir ki, artıq 45 ildir Gəncə paxlavasının hazırlanmasını sənətinə çevirən Dürdanə xanımın əl əməyi təkcə şəhərimizdə deyil, ölkənin müxtəlif bölgələrində də tanınır və rəğbətlə qarşılanır.
Gəncə paxlavasının hazırlanma qaydası belədir:
Əvvəlcə qoz ləpəsi qabıqdan təmizlənir. Bunun üçün ləpələr sobaya qoyulur. İsindikdən sonra cıqqıltı səsləri gəlməyə başlayır. Həmin vaxt qoz ləpələri isti suya salınır və qabıqları daha rahat soyulur. İçliyin hazırlanması üçün qoz ləpəsi çəkəndən keçirilir və alınan 2 kiloqram qoz kütləsinə 1 kiloqram 800 qram şəkər tozu əlavə olunur.
Növbəti mərhələdə xəmir yoğurulur. Bir qədər dincəldikdən sonra xəmir 10 kündəyə bölünür.
Daha sonra mis məcməyi yağlanır. Oxlovla yayılan birinci və sonuncu kündə digərlərinə nisbətən daha qalın və böyük diametrdə hazırlanır. Birinci qat salındıqdan sonra üzərinə isti yağ tökülür və ikinci qat yerləşdirilir. Sonrakı qatların arasına isə paxlavanın içliyi əlavə olunur.
Bundan sonra xəmir eyni ölçüdə hissələrə bölünür. Paxlavalar zövqə uyğun şəkildə bəzədilir. Rəng verildikdən sonra künclərinə xaş-xaş qoyulur, üstü isə qoz və badamla bəzənir.
Şərbətin hazırlanması üçün gülab (bir yarım stəkan), su (bir stəkan), şəkər tozu (yarım kiloqram), iki dilim limon və bir qaşıq bal qarışdırılır.
Bişirmə mərhələsində əvvəlcə ocaq qalanır və paxlavanın alt hissəsi közün üzərində bişirilir. Bu zaman dilimlər bıçaqla bir-bir ayrılır və aralarına ümumilikdə bir yarım stəkan qaynar yağ tökülür. Alt hissə bişdikdən sonra məcməyi közün üzərindən götürülərək yaş əski üzərinə qoyulur. Məqsəd paxlavanın altının yanmasının və qaralmasının qarşısını almaqdır. Üst hissənin bişməsi üçün isə məcməyi tiyanla örtülür və üzərinə köz qoyulur.
Təxminən yarım saat sonra paxlavalar aralanmağa başlayır. Bu zaman közün üstündə qaynadılmış şərbət qaşıqla az-az paxlavanın üzərinə tökülür.
Qeyd edək ki, 3 kiloqramlıq məcməyidə dədə-baba üsulu ilə hazırlanan paxlavadan 65 ədəd çıxır. Daha xırda kəsildikdə isə bu say 75-78 ədədə qədər artır. Bu isə tamamilə zövqdən asılıdır.
