Gəncədə illər öncə cinayət törədən şəxs tutulub. Bu haqda 29 fevral tarixində Oxu.az-a istinadən məlumat veririk.
Gəncə Ağır Cinayətlər Məhkəməsində qətl törətməkdə və satış məqsədi olmadan qanunsuz olaraq, narkotik vasitə saxlamaqda təqsirləndirilən Elsevər Məmmədovun cinayət işi üzrə məhkəmə iclası yekunlaşıb. Həmin şəxs 12 il müddətinə azadlıqdan məhrum edilib. Həmçinin onun cəza çəkdiyi müddətdə narkomaniyadan məcburi müalicə alması qeyd olunub. O, yaşayış yeri üzrə narkoloji kabinetdə profilaktiki qeydiyyata alınacaq.
Qeyd edək ki, 15 fevral 2000-ci ildə 1939-cu il təvəllüdlü şəhər sakini Solmaz Rzaqulu qızı Yolçuyevanın yaşadığı evdə meyiti tapılaraq, bədənində xəsarətlər aşkar olunması faktına görə şəhər prokurorluğunda 2000-ci ilədək qüvvədə olmuş Cinayət Məcəlləsinin 95-ci maddəsi ilə (qəsdən adam öldürmə) cinayət işi başlanaraq istintaq aparılsa da, təqsirləndirilən şəxs müəyyən edilmədiyindən iş üzrə icraat 16 iyul 2001-ci il tarixdə dayandırılıb.
16 avqust 2022-ci ildə icraat təzələnərək istintaq Gəncə Şəhər Prokurorluğu tərəfindən davam etdirilib. Kompleks istintaq hərəkətləri və əməliyyat-axtarış tədbirləri həyata keçirilib. Nəticədə şəhər sakinləri - 1977-ci il təvəllüdlü E.Məmmədov, 1980-ci il təvəllüdlü Xəyal Səfərov və 1978-ci il təvəllüdlü Arzu Hacıyevin cinayət əlaqəsinə girərək külli miqdarda pulu quldurluq yolu ilə talamaq məqsədilə Solmaz Yolçuyevanı yaşadığı mənzildə qəsdən öldürmələrinə əsaslı şübhələr müəyyən edilib.
Məmmədov tutularaq istintaqa cəlb olunub. Səfərovun 2001-ci ildə Qazaxıstanda, Hacıyevin isə 2004-cü ildə Rusiya Federasiyasında ölmələri müəyyən edilib. Toplanan sübutlar əsasında şübhəli şəxs barəsində həbs qətimkan tədbiri seçilib.
O, saxlanılan zaman şalvarının sağ yan cibindən 0,04 qram çəkidə “methadone-40” narkotik maddə aşkar edilərək götürülüb.
