Bu gün, iyulun 22-si, Azərbaycan milli mətbuatının yaranmasına töhfə verən, maarifçi Zərdabinin ərsəyə gətirdiyi “Əkinçi” qəzetinin yaranmasından 150 il ötür. 1991-ci ildən məhz bu gün Azərbaycanda Milli Mətbuat Günü kimi qeyd olunur.
Gencexeber.az məlumat verir ki, bu qəzetin nəşri Azərbaycan xalqının yaddaşına qızıl hərflərlə yazılmış unudulmaz tarixlərdən biridir. “Əkinçi” çox çətin, mürəkkəb bir dövrdə xalqı maarifləndirmək, məlumatlandırmaq, insanlara ana dilində qəzet oxumağı aşılamaq kimi mühüm missiyaları üzərinə götürərək böyük bir jurnalistika məktəbinin əsasını qoyub.
1875-ci ilin 22 iyulunda yaradılan qəzet azərbaycanlıların ilk mətbuat orqanı olub. İllər sonra isə Gəncənin ilk qəzeti olan “Gəncənin səsi” çap edilməyə başladı. Bu qəzet, həmçinin ölkənin ilk region qəzeti olub.
Qəzet 5 may 1920-ci ildə “Qırmızı Gəncə” adı ilə fəaliyyətini davam etdirir. Mətbu orqanının adı 7 dəfə dəyişdirilib. Daha sonra qəzet “Zərbə”, “Kirovabad bolşeviki”, “Kirovabad fəhləsi”, “Gəncə kommunisti” (Gəncə vilayət mərkəzi olduğu zaman qəzet qısa bir müddətdə bu adla çıxıb), “Kirovabad kommunisti”, 1990-cı ildən “Gəncənin səsi” adı ilə oxuculara təqdim olunub. Qəzet, həmçinin dəfələrlə əlifbasını da dəyişib: “Qırmızı Gəncə” ərəb, “Zərbə” latın, “Kirovabad bolşeviki” kiril, “Gəncənin səsi” yenidən latın əlifbası ilə çıxıb.
