Koreya Respublikasının paytaxtı Seul şəhərində Azərbaycanın Müstəqillik Gününə həsr olunmuş tədbir çərçivəsində azərbaycanlı rəssamların əsərləri sərgilənib.
Gencexeber.az-ın əldə etdiyi məlumata görə, tədbir Azərbaycan Respublikasının Seuldakı səfirliyinin təşkilatçılığı ilə baş tutub. Sərgidə Azərbaycandan dəvət olunan 5 rəssam arasında Gəncənin Mehdi Mehdizadə adına 4 nömrəli xarici dil təmayüllü məktəb-liseyinin 5-ci sinif şagirdi, 11 yaşlı Rəsmiyyə Yunis qızı Vəliyeva da yer alıb.
Ən gənc iştirakçı olan Rəsmiyyə sərgidə Şuşa şəhərinə həsr etdiyi rəsmi ilə diqqət çəkib. Onun əsəri Azərbaycanın Koreya Respublikasındakı fövqəladə və səlahiyyətli səfiri Ramin Səfərov tərəfindən yüksək qiymətləndirilib və səfir həmin əsəri şəxsi qalereyasında saxlayacağını bildirib.
Qeyd edək ki, Rəsmiyyə Vəliyevanın əsərləri bundan əvvəl Braziliyada keçirilən beynəlxalq tədbirdə də sərgilənib.
