Gəncədə polisin tələblərinə əməl etməyən sakin saxlanılıb. Bu haqda 5 yanvar tarixində Unikal.az-a istinadən məlumat veririk.
16 dekabr 2022-ci il tarixində polis əməkdaşları şəhər ərazisində metal axtaran Elxan Mirzəyevə (ad-soyad şərtidir) yaxınlaşaraq nə işlə məşğul olduğunu soruşublar. O, işsiz olduğu üçün zibilliklərdə metal yığıb özünü saxladığını deyib. Polislər ondan şübhələniblər və bəzi suallar veriblər. Telefon nömrəsini götürdükdən sonra onu sərbəst buraxıblar.
Elxan evə gedib, polislərin ona olan münasibətindən əsəbiləşib və Daxili İşlər Nazirliyinin "102" xidmətinə zəng edərək dövlətdən və polislərdən narazı olduğunu bildirib, söyüş söyüb. Daha sonra, 3 yanvar tarixində saat 11:30 radələrində 1-ci Polis Şöbəsinin qarşısında səs-küy salaraq polisin qanuni tələblərinə əməl etməyib.
Sakin barədə protokol tərtib olunub. O, 15 gün müddətinə inzibati qaydada həbs edilib.
