Gəncə şəhəri deyildikdə ilk olaraq Cümə Məscidi və İmamzadə türbəsi kimi möhtəşəm dini abidələr yada düşür. Lakin şəhərin ruhunu daha yaxından hiss etmək istəyənlər üçün Gəncənin digər məhəllə məscidləri xüsusi bir səyahət təcrübəsi təqdim edir.
Gəlin bu məscidlərlə tanış olaq:
Qırxlı məscidi – 1650-ci ildə inşa edilib və bu gün məhəllə məscidi kimi dini fəaliyyət göstərir.
Zərrəbi məscidi – 1880-ci illərdə eyniadlı məhəllə sakinləri tərəfindən inşa edilib. Bu gün kitabxana və Gəncə Dövlət Dram Teatrının açıq səhnəsi kimi fəaliyyət göstərir.
Qazaxlar məscidi – 1801-ci ildə Qazaxdan köçürülmüş tayfalar tərəfindən inşa edilib. Bu gün məhəllə sakinləri üçün dini fəaliyyət göstərir.
Qızılhacılı məscidi – 1877-ci ildə eyniadlı məhəllə sakinləri tərəfindən inşa edilib və hal-hazırda 22 nömrəli filial kitabxana kimi fəaliyyət göstərir.
Hüseyniyyə məscidi – XIX əsrin ortalarında Qacar nəslindən olan Səbiya xanımın təşəbbüsü ilə inşa edilib. Bir zamanlar mədrəsə və "Nizami və Puşkin" adına kitabxana kimi fəaliyyət göstərib.
Ozan məscidi – 1884-cü ildə Ozan məhəlləsinin sakinləri tərəfindən tikilib. Hal-hazırda kitabxana kimi fəaliyyət göstərir.
Bala Bağman məscidi – 1885-ci ildə məhəllə sakinləri tərəfindən tikilib. Hal-hazırda həm kitabxana, həm də dini məkan kimi fəaliyyət göstərir.
Bundan başqa, Gəncədə Mollacəlilli, Toyuqçu, Şahsevənlər və Xəlfəli məscidləri də mövcuddur.
Gəncənin məhəllə məscidləri yalnız dini abidələr deyil — onlar şəhərin yaddaşı, mədəni kimliyi və səssiz tarix danışan canlı məkanlardır. Qərb bölgəsinə səyahət edən hər bir ziyarətçi bu məhəllə məscidlərini marşrutuna daxil etməklə Gəncəni daha dərindən tanıya bilər.
Mənbə: Gəncə Regional Turizm İdarəsi
