Xəbər verdiyimiz kimi, gəncəli Xalq artisti Maqsud Məmmədov vəfat edib. Artıq görkəmli baletmeysterin dəfn olunacağı yer barədə məlumat verilib.
Report.аz-ın sorğusuna cavab olaraq Mədəniyyət Nazirliyindən bildirilib ki, Xalq artisti Maqsud Məmmədov Bakıda, İkinci Fəxri xiyabanda dəfn olunacaq.
Qeyd olunub ki, görkəmli baletmeysterlə bu gün Bakının Təzə Pir məscidində vida mərasimi keçiriləcək.
Məlumat üçün bildirək ki, 97 yaşında dünyasını dəyişən Maqsud Davud oğlu Məmmədov 30 may 1929-cu ildə Gəncədə anadan olub.
Bakı Xoreoqrafiya Məktəbinə daxil olan Maqsud Məmmədovun yüksək sənət göstəriciləri nəzərə alınaraq Moskva Xoreoqrafiya Məktəbinə göndərilib və 1950-ci ildə bu təhsil ocağını bitirib.
O, 1951-ci ildən Azərbaycan Dövlət Akademik Opera və Balet Teatrında çalışıb. Onun həyat yoldaşı, görkəmli balerina, Xalq artisti Rəfiqə Axundova ilə birgə quruluş verdiyi Tofiq Bakıxanovun "Xəzər balladası", Fərəc Qarayevin "Qobustan kölgələri", "Kaleydoskop", Rauf Hacıyevin "Azərbaycan süitası", Nazim Əliverdibəyovun "Muğam", Aqşin Əlizadənin "Babək" baletləri istedadlı baletmeysterə böyük şöhrət qazandırıb.
Milli mədəniyyətimizin inkişafında xidmətlərinə görə Maqsud Məmmədov 1955-ci ildə "Əməkdar artist", 1970-ci ildə isə "Xalq artisti" fəxri adlarına layiq görülüb.
2019-cu ildə "Şöhrət" ordeni ilə təltif olunan sənətkar 2002-ci ildən Prezidentin fərdi təqaüdçüsü idi.
