6 saylı Gəncə Neft Baza Sahəsindən bir müddətdir bəzi yanacaqdoldurma məntəqələrinə yanacaq verilməsində problemlər yaranıb.
Gencexeber.az məlumat verir ki, şikayətçilər məsələnin neft bazasının rəhbərliyindən yox, "SOCAR Petroleum" QSC-nin tətbiq etdiyi yeni tələblərlə bağlı olduğunu iddia edirlər. Bildirilir ki, yanacaq ehtiyatı olsa da, məntəqələrdən gündəlik dövriyyəni əks etdirən yekun kassa sənədi – "zet" tələb olunur.
Sahibkarlar isə bu tələbin əsassız olduğunu qeyd edirlər. Onların sözlərinə görə, bütün satış əməliyyatları onsuz da vergi sisteminə inteqrasiya olunub və gündəlik dövriyyə müvafiq qurumlar tərəfindən izlənilir.
Şikayətçi Məmmədəli Novruzov bildirib ki, yeni qaydalar onların fəaliyyətinə ciddi maneə yaradır: "Bunlar təzə bir qayda çıxarıblar. Deyirlər əvvəlcə "zet" təqdim etməlisən. Axı bizim kassa aparatları Vergilər Nazirliyinə bağlıdır, hər şey görünür. Yanacaq olsa da, burada verilmir, məcbur qalırıq Salyandan, Bakıdan, Ucardan gətirək. Bu qədər yol getmək təhlükəlidir".
Digər sahibkar Hikmət Musayev də oxşar vəziyyətlə üzləşdiyini deyir:
"Gecə saatlarından gəlib gözləyirik. Deyirlər yanacaq bölgüsü var, amma "zet" yoxdur. Bizi buradan göndərirlər başqa rayona, oradan da başqa yerə. Sonda deyirlər, get Bakıya".
Qeyd olunur ki, yeni tələblərdən narazı olanların sayı kifayət qədər çoxdur.
Məlumat üçün bildirək ki, 6 saylı Gəncə Neft Baza Sahəsi ölkənin qərb bölgəsində fəaliyyət göstərən yanacaqdoldurma məntəqələrinin böyük hissəsini yanacaqla təmin edir. Mövcud vəziyyət isə həmin məntəqələrin fəaliyyətində ciddi çətinliklər yaradıb.
