Şəmkir rayonunda 46 yaşlı kişi həmkəndlisinə xəsarət yetirib.
Demokrat.аz xəbər verir ki, hadisə rayonun Yuxarı Seyfəli kəndində baş verib. 1985-ci il təvəllüdlü Ayaz ilə həmkəndlisi Kənan arasında şəxsi münasibətlər zəminində münaqişə yaşanıb.
Buna səbəb isə Kənanın idarə etdiyi avtomobilin uzaq işıqlarını yandırması olub. Mübahisə zamanı Araz yumruqla Kənanın göz nahiyəsinə qəsdən vurub.
Ayazın barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib. İş üzrə izahat verən Ayaz ona elan olunmuş ittiham üzrə özünü təqsirli bilib.
Şəmkir Rayon Məhkəməsinin hökmü ilə "Konstitusiya və Suverenlik İli" münasibətilə amnistiya elan edilməsi haqqında Milli Məclisinin 19 dekabr 2025-ci il tarixli qərarı tətbiq edilib və təqsirləndirilən şəxs cinayət məsuliyyətindən azad edilib. Onun barəsində olan cinayət işi üzrə icraata xitam verilib.
