Bu gün Gəncə Dövlət Milli Dram Teatrının aktyoru, şəhərin dövlət, rəsmi və mədəni-kütləvi tədbirlərinin aparıcısı və müğənni Elvin Alnağıyevin doğum günüdür.
Gencexeber.az məlumat verir ki, Elvin Telman oğlu Alnağıyev 1988-ci il aprelin 13-də dünyaya gəlib. Gəncə şəhəri Vaqif Əliyev adına 12 saylı tam orta məktəbin məzunu olan müğənninin uşaq yaşlarından musiqi və incəsənətə böyük maraq göstərib. O, Uşaq İncəsənət Məktəbində xanəndəlik və nağara ixtisasları üzrə təhsil alıb. Tanınmış xanəndə Mahir Nəsirovun və nağara müəllimi Söhrab İbrahimovun tələbəsi olub.
Sənətə olan sevgisi Elvin Alnağıyevin yolunu teatra salıb. Gəncə Dövlət Milli Dram Teatrının əvvəlki rəhbərliyi onun istedadını, özünəməxsus səs tembrini yüksək qiymətləndirərək truppaya dəvət edib. O, teatr fəaliyyətində Xalq artisti Vaqif Şərifov, Faiq Qasımov, Alim Məmmədov, Novruz Cəfərov, Pərvanə Qurbanova, Elxan Abbasov, İlham Hüseynov, Ramiz Vəliyev, Kəmalə Məmmədova və digər sənətkarlarla birgə çalışaraq onlardan bəhrələnib.
Aktyorun yadda qalan obrazlarından biri də "Sabir" tamaşasında canlandırdığı Abbas Səhhət rolu olub.
