Tərk edilmiş körpəni binanın zirzəmisində digər heyvanların hücumundan pişik qoruyub.
Bu barədə Sosial Xidmətlər Agentliyinin valideyn himayəsindən məhrum olunmuş uşaqlarla iş şöbəsinin rəhbəri Cavid Şahmalıyev DOST TV-yə açıqlama verib.
"Bu, atılmış uşaqdır. Lakin hadisə başdan-ayağa möcüzədir. Uşaq dördüncü gün tapılıb, polis körpənin ağlamaq səsini eşidərək köməyə gəlib. Hazırda uşaq müalicə altındadır. Ona beyindaxili qanaxma diaqnozu qoyulub. Bədənində heyvan hücumu nəticəsində yaranmış yaralar müəyyən olunub. Dörd gün ərzində zirzəmidəki heyvanlar ona hücum etməyə cəhd göstərib, lakin pişik onu qoruyub, körpənin yanından bir addım belə ayrılmayıb. Bunu uşağa qayğı göstərən xəstəxana işçiləri özləri bildiriblər", — deyə Şahmalıyev qeyd edib.
Onun sözlərinə görə, uşaq tapılanda üzündə və qulaqlarında çoxlu pişik tükü olub.
Xatırladaq ki, oktyabr ayında Mingəçevirdə bir binanın zirzəmisində 1,5 yaşlı oğlan uşağı tapılmışdı. Uşaq dərhal xəstəxanaya yerləşdirilib və hazırda Bakıda müalicə olunur.
Bir neçə gün əvvəl isə Mingəçevirdə polis əməkdaşları uşağın anası — 1994-cü il təvəllüdlü G. Məmmədovanı saxlayıblar. Hazırda qadının uşağı bilə-bilə həyat və sağlamlıq üçün təhlükəli vəziyyətdə qoymasına görə cinayət məsuliyyətinə cəlb olunub-olunmaması məsələsi araşdırılır.
